Kuingia Kazini

Kozi Mafunzo ya Msingi > Juma la 4 > Dokezo

Dokezo: Karibu kwenye somo la nne. Tumekamilisha mada kadhaa muhimu sana hadi sasa—lakini bado kuna zingine nyingi mbele. Kwa hivyo hebu tuendelee kusonga mbele! Hata hivyo, unapofanya hivyo, jitahidi sana kuendelea kufanyia kazi maeneo ambayo tayari tumejifunza. Utakabiliwa na jaribu la kuacha juhudi zako za kutenga muda mara kwa mara ili kuichunguza Biblia na kutumia shajara yako ya maombi. Usiruhusu litokee! Uanafunzi ni endelevu. Kila hatua hujengwa juu ya zile zilizotangulia. Kwa hiyo jitahidi kuwa mwaminifu katika kila jambo ambalo umelisoma hadi sasa. Katika somo hili, tutakuwa tukiangalia eneo lingine la uanafunzi lenye changamoto—labda ndilo linalopuuzwa zaidi kuliko yote! Bila shaka tutakuwa tukizungumzia utii. Kuhusu “kuingia kazini” katika kutekeleza yale ambayo Kristo anatuambia. Mapendekezo yaliyo mbele yanaweza kuonekana rahisi—lakini yanaweza kubadilisha maisha yako kabisa. Kwa hiyo weka juhudi kubwa katika kuyatekeleza. Huenda mambo yasiwe vilevile tena... Mhariri, Amefichwa katika Kristo

Kuingia Kazini

Kozi Mafunzo ya Msingi > Juma la 4 > Malengo

Jina:			Saini:
Tarehe:

Kamilisha Uchunguzi wa Biblia wenye kichwa kisemacho Kuingia Kazini. Hakikisha unatumia muda bora kwenye masomo haya na siyo tu unayapitia haraka dakika za mwisho.

Juma hili utakuwa na kile ambacho huenda ni aya ya kukariri isiyofahamika, inayoweza kufanya iwe vigumu kukariri: II Wakorintho 8:11. Lakini fanya kadiri ya uwezo wako wote, na punde aya hii itakuwa kipenzi. Pia, hivi umejikita kwenye aya zako zingine zote hadi sasa? Endelea kuzipitia upya kila siku.

Soma Mapendekezo ya Kutendea Kazi kuhusu kudhibiti muda wako na anza kuzijenga kanuni hizi maishani mwako. Kila kipengele cha uanafunzi hutegemea matumizi yetu ya muda. Mwombe Mungu akusaidie kufaidika nazo vilivyo!

Durusu vielelezo vyote ambavyo umejifunza kufikia sasa, kisha ongeze kinachofuata: Uma. Kama ilivyo kwa aya—kuhifadhi vielelezo hivi muda mrefu hutegemea marudio ya mara kwa mara. Jaribu kufikia hatua ambapo unaweza kuchora vyote vinne unapovitazama mara moja tu.

Kwa kuwa somo hili linalenga utiifu, tumia muda fulani kutathmini uaminifu wako hadi sasa. Je, Kesha lako la Asubuhi limekuwa thabiti kiasi gani? Je, umeshaanzisha shajara yako ya maombi binafsi—na umeanza kuitumia? Ikiwa unatatizika katika eneo fulani, mwombe Mungu akuoneshe nini kitakachohitajika ili kupata ushindi halisi.

Kuingia Kazini

Kozi Mafunzo ya Msingi > Juma la 4 > Uchunguzi wa Biblia

1.	Yesu alifundisha nini kuhusu utii katika kila moja ya aya zifuatazo za Mahubiri Mlimani? Mathayo 5:19 Mathayo 6:24 Mathayo 7:13-14 Mathayo 7:21
2.	Kwa nini unafikiri Yesu alitumia muda mwingi sana kuzungumzia utii? Andika muhtasari wa mawazo ya Yesu kuhusu umuhimu wa utii:

3.	Katika aya zifuatazo, Yesu alisema gharama ya utii inaweza kuwa nini? Luka 14:26 Luka 14:33 Nini maana ya vielelezo ambavyo Yesu alivitumia katika Luka 14:28-32?
4.	Yesu alishughulikaje mara kwa mara na wale waliotoa visingizio vya kutomfuata mara hiyo? Luka 9:57-62 Walinganishe watu hao hapo juu na wale waliobainishwa katika Marko 1:16-20 na Luka 5:27-28. Je, ungeweza kujiainisha kama mwanafunzi wa aina gani?

5.	Biblia inasemaje tunapaswa “kuisikiliza” sauti ya Bwana na kwa nini? Kumbukumbu la Torati 28:1-2 Ni ipi sababu moja ya Wakristo wengi kutokua kiroho? Mithali 13:4 Paulo aliwatia moyo waumini kwa bidii kiasi gani ili kutekeleza yale aliyokuwa amewafundisha? I Wathesalonike 4:1
6.	Nini thawabu ya uaminifu? I Timotheo 1:12 Mathayo 25:21,23
7.	Je, uko radhi kiasi gani kujitoa sasa hivi kujenga mtindo wa maisha ya utii binafsi zaidi kwa Yesu Kristo? Kwa nini usiandike jibu lako liwe sala fupi kwa Mungu?

Kuingia Kazini

Kozi Mafunzo ya Msingi > Juma la 4 > Mapendekezo ya Kutendea Kazi

"Kuingia kazini" katika maisha ya Kikristo kunahusu namna ambavyo mtu anatumia muda. Kwa hakika, uanafunzi ni muda—iwe unamtafuta Bwana kupitia maombi, au kukariri aya fulani. Huduma pia, ni muda uliowekezwa maishani mwa watu wengine.

Lakini muda una njia ya kuteleza katika vidole vyetu—na Wakristo lazima wajifunze kuurejesha kwa nguvu. Unataka kuwa thabiti zaidi katika uanafunzi? Kuzaa matunda zaidi katika huduma? Jifunze kuudhibiti muda wako. Ingia kazini! Aya zilizo mbeleni zitasaidia.

Usimamizi wa Muda

Ingawa kuna mifumo mbalimbali ya kuudhibiti muda wako, mingi ina sifa moja inayofanana: ugumu usio wa lazima. Maisha ni magumu vya kutosha. Kutumia mfumo uliokusudiwa kuleta ufumbuzi wa maisha hakupaswi kuongeza tatizo husika! Kuna vitu viwili hasa unavyohitaji katika mfumo wa usimamizi wa muda. Kwanza, sehemu fulani ya kutunza orodha kuu ya kazi zako zote. Na pili, mahali pa kutunza kazi zako kwa kila siku.

Hili hapa ndilo jambo tunalopendekeza. Andaa nafasi katika daftari lako la Kesha la Asubuhi kwa ajili ya orodha yako kuu ya kazi. Chukua karatasi tupu na uanze kuandika kila kitu unachoweza kufikiria unachohitaji kufanya. Kuandika tu haya kutoka kichwani mwako husaidia sana kupunguza msongo. Na wala hata huwezi kulazimika kupata msongo wa mawazo kuhusu kupuuza kazi fulani. Ukisahau kazi fulani mara ya kwanza, liongeze tu wakati mwingine unapolifikiria.

Pili, tengeneza orodha fupi ya kazi kila asubuhi kwa ajili ya siku hiyo, kama sehemu ya muda wako wa ibada. Ifikirie kama orodha yako ya “mambo ya kufanya” kila siku. Tumia orodha yako kuu kukagua kazi zijazo, na kwa maombi chagua zile unazoamini Mungu anataka ufanye siku hiyo. Ziandike kwenye kadi ya 3x5 au kitu kama hicho, na ukae nayo. Ziorodheshe kwa mpangilio unaopanga kuzifanya. Kisha, jikite kuzitekeleza kazi hizo unapoendelea na siku yako.

Hapa kuna jambo zuri kuhusu mbinu hii: ni rahisi sana kuanza. Orodha yako kuu ya kazi si lazima iwe kamilifu mwanzoni. Andika tu kile kinachokuzonga zaidi, kisha endelea kuongeza vipengele kadiri vinapokuja akilini. Unachohitaji kwa siku yako ya kwanza, kwa kweli, ni maelezo ya kutosha ili kuweka mpango kwa ajili ya siku hiyo moja!

Maisha ya Ibada

Siri halisi ya kudhibiti maisha yako kwa ufanisi zaidi ni kufungamanisha vilivyo usimamizi wako wa muda na ibada zako. Zana na mbinu zina nafasi yao, lakini badiliko halisi la maisha huanzia ndani na kutenda kazi kwenda nje. Na badiliko hilo hutokea tunapotumia muda pamoja na Kristo.

Hakikisha unatenga muda mfupi kila asubuhi katika ibada zako ili kukagua orodha yako kuu ya majukumu. Muulize Mungu ikiwa kuna vitu unavyohitaji kuongeza kwenye orodha hiyo, au kuviondoa. Labda umeandaa matumizi fulani binafsi katika kujifunza kwako Biblia, au uliguswa kuchukua hatua fulani, huku ukiomba. Yaandike haya ukingali unayakumbuka akilini mwako. Ikiwa Mungu anazungumza nawe kuhusu kazi fulani iliyopo kwenye orodha yako, iwekee alama ya nyota kando yake. Kadiri unavyoona nyota nyingi kando ya jukumu fulani, ndivyo unavyojua zaidi kwamba unahitaji kuendelea nayo.

Vivyo hivyo, tengeneza orodha yako ya majukumu ya kila siku kwa maombi. Mwombe Mungu akuguse utambue mambo halisi ambayo angetaka ufanye. Mwombe akusaidie kutekeleza kazi hizo, na kuyabariki matokeo. Wakati huohuo dumu kuwa tayari kufuata uongozi wa Mungu siku nzima—na urekebishe mipango yako vyovyote vile kadiri kudra Yake inavyoonesha. Hatimaye, lengo ni kuleta maisha yako zaidi na zaidi yapatane na mapenzi Yake, kila siku. Hiyo ndiyo ibada ya kweli.

Kuna mengi zaidi unayoweza kufanya ili kuongeza muda wako kwa ajili ya Kristo. Kwa maelezo zaidi, tumeandaa kozi nzima fupi husika inayoitwa Mfumo wa Kuzingatia Maisha. Unaweza kujiandikisha kwenye WWW.FAST.ST/LFS. Pia tuna fomu mbalimbali za usimamizi wa muda, nyenzo za kupanga mikakati, na hata zana ya kudhibiti muda mtandaoni. Ziangalie kwenye WWW.FAST.ST/BT-GIFT.

Kidokezo cha Kukariri Maandiko: Kukariri aya zinazojikita kwenye bidii, uadilifu, na mada zingine husiani, humruhusu Roho Mtakatifu kuangaza aya hizo akilini mwetu wakati wowote ambapo hatutumii muda wetu kwa busara. Hatimaye, Neno la Mungu linaweza kubadili utambuzi wetu wote juu ya thamani ya muda.

Umuhimu wa Kujitoa

Kama ilivyo kwa kila eneo la uanafunzi, utii unahitaji kujitoa asubuhi baada ya asubuhi—ili kutambua mpango wa Mungu kwa ajili ya siku yako, na kuutekeleza. Utii ndio mtazamo wa akili unaopaswa kukuzwa. Hatimaye, inalenga kwenye kujisalimisha wakati wa kufanya uamuzi. Je, utafanya kile ambacho Mungu ameagiza, au la? Uamuzi ni wako.

Kuingia Kazini

Kozi Mafunzo ya Msingi > Juma la 4 > Kielelezo